تبریز سسی : ايلک اؤنجه سيزين چاليشمالارينيز اوچون سيزي تبريک ائديب و ايتيرديگيميز گنج فعاليميز، مهنديس غلامرضا اماني و ايکي قارداشينين اؤلومو موناسبتيله سيزه باش ساغليغي وئريريک.

بيليرسينيز کي، باي بک توپلومو اولاراق، باي بک سيته سي واسيطه سيله بير چوخلو قونولارا گؤروش بيلديريب و ميللي حرکاتيميزدا اولان گليشمه لري تعقيب ائتميشيک. بلليدير کي بو يولدا سهولريميز اولموشدور، آما بعضن ده يئرسيز يئره تخريب اولونوب و تهديد اولموشوق.

بايراق و سيمبول قونوسو، باي بک گؤروشونده، اؤنملي و چؤزولمه سي گرکلي اولان قونولارداندير. بو مسئله ايله ايلگيلي ايللردير کي چابا گؤستريريک و زمينه ني سون قرار آلماق اوچون حاضيرلاييريق.

سيزين اؤنرديگينيز سيمبول گئچيجي اولسادا، بير چوخلو فعال و قورومون اونايين قازانميشدير. اؤنري يؤنتمي، دؤزوملو يوروشو و دمکراتيک يول ايله اوناي قازانماسي بيزي سئوينديرير. بونلارا باخاراق، باي بک اولاراق بو سيمگه نين اونايلانماسيندان ياناييق.

آنجاق، سون قرار وئريله نه قدر، بو مسئله يالنيز بير طرفدارليق اولاراق گئچرليدير و اگر ميللي حرکاتيميزدا هر هانسي بير بايراق سئچيليرسه، باي بک اولاراق اونو دستکله يه جه ييک.

تانيقلار بئله گؤسترير کي ايچريده کي موستقيل فعاللارين اؤنرديگي بايراق، سئچيلمک اوچون بير تک و ان گوجلو آدايدير.

بو باره ده بير چوخلو قوروم و فعال آچيق اوناي وئريبلر و اصلينه باخاندا، يالنيز ايکي قوروم سس سيز قالماغي سئچيبلر. باي بک بو سس سيزليگي اونلارين ناحق اولدوقلاري، تحميلکار و ديکتاتور اولدوقلارينين گؤسترگه سي اولاراق قبول ائدير.

اگر اؤنريلن سيمبولون اونايلايانلاريني ليسته له مک ايسته ييرسيز، آچيقجاسينا باي بک توپلوموندان آد آپارا بيليرسيز. باي بک 29/10/2008 تاريخيندن اعتبارن، اؤنريلن زماندان بري ياپديغي کيمين، رسمي اولاراق قارا آي اولدوزلو بايراغي دستکله يير.

باي بک هر زمان بيرليکدن يانا اولوب و هر هانسي واسيطه کي، بيرليک يولوندا يارارلي اولا بيلير، قوللانماسين اؤنريب. بايراق و ميللي سيمبول بيرليک يارادان واسيطه لردن بيري ساييلير.

بو يازي باي بک توپلومونون رسمي آچيقلاماسيدير. اولدوغو کيمي قوللانماسي سورونسوزدور.

درين حؤرمتله

باي بک توپلومو

تبريز

29/10/2008