تبریز سسی : گؤنئی ین اؤز بایراغی نین اولماسی بؤتؤو آذربایجان ایدآلینا نه اینکی قارشی دئییل ، بلکه بؤتؤوله شمه یه دوغرو آتیلان اؤنملی آددیملاردان بیریدیر .

گؤنئی آذربایجان شهرلرینده گؤجلو میللی حرکت گئدیر . ایران حاکمییتینه قارشی اعتیراضلار و ناراضی لیقلار میللی کارئکتر کسب ائدیبدیر ، و بو دا البتده طبیعی بیر حالدیر . و ان اؤنملی سی ایسه اودور کی ، بو حرکت گئتدیکجه کوتلوی لشیر . بو او دئمک دیر کی ، بو حرکتین قارشیسنی آرنیق هئچ بیر قووه آلابیمه یه جک .

بو ، مسئله نین بیر اؤزؤدؤر . لاکین جریاندا اولان میللی حرکتی دؤنیا ایجتماعییتینه چاتدیرماق ایسه باشقا مسئله دیر . بیز یاخشی بیلیریک کی ، دؤنیا یا سسلنمک اؤچؤن اؤز گؤجؤمؤزه آرخالانمالییق .

میللی حرکتی دؤزگؤن ایستیقامتده آپارماق و ایسته دیی هدفلره دؤغرو یؤنه تمه ک هر شئی ده ن اؤنجه جمعییتین آیدین کسیمینین گؤره ویدیر . بو ایستیقامتده میللی آیدینلاریمیزین موجادیله لری تقدیره لاییقدیر . لاکین بایراق مسئله سینه گلدیکده بیزیم بعضی میللی آیدینلار بیلمییه ره کده ن یانلیشلیقلارا یول وئریرلر . اونلا قوزئی آذربایجان جمهوریتینین بایراغینی قالدیرماقلا بیلمه ده ن میللی کوتله وی حرکته زیان وورورلار .

آذربایجان جمهوریتی بیزیم دوغما اؤلکه میزدیر . بیز اونون وارلیغینی هئچ زامان دانا بیلمه ریک . باشقا سؤزله دئسک قوزئی آذربایجان بیز گؤنئی لی لرین آیری دوشموش قارداشی دیر . و قارداش قارداشلا بیر اولمالیدیر نهایت . بو البتده تکجه بیر ایدال دئییلدیر . و گله جه یین ده گئرچه یی دیر . آمما بو آجی گئرچک ده وار کی ، بیرلیک همیشه آسانلیقلا الده ائدیلبمیر . بیرلیک شوعاری وئرمک له بیرلیک یارانمیر . بس نئیله مک لازیمدیر ؟ پولیتیکا ایشلتمک .

گؤنئی ده جریان دا اولان بعضی میتینگ لرده و ائله جه ده خاریجده اولان گؤنئی ین حاق سسینی دؤنیا ایجتماعیتینه چاتدیرماق پروسئسینده قوزئی آذربایجان بایراغینی قالدیرماق بیر نئچه جهت ده ن هئچ ده دؤزگؤن تشببوث دئییل دیر . من بونو ایضاح ائتمه یه چالیشاجاغام .

سون یؤز ایلده اولمازین ظؤلم له لره معروض قالان گؤنئی آذربایجان میللی موباریزه لرده ن هدفی شؤبهه سیز کی ، ایستیقلالدیر . میللی ایستیقلال . بو قوتسال آمالی گئرچکلشدیرمک اؤچؤن میللی بیرلیک ان اؤنملی عامیل لرده ن بیری ساییلیر . باشدا میللی تشکیلتلارین ایستیقلال اوغروندا همرای لیکلری واجیب و گره کلیدیر . بو ایچ بیرلیی اولمادان ایستیقلال آمالینا چاتماق قئیری ــ مومکوندؤر .

پارچالانمیش گؤنئی له قوزئی ین بیرلشمه سینی کیمسه آرزو ائتمه یه بیلمه ز . لاکین رئال دؤنیانین گئرچکلری بو آمالا چاتماغا بیر باشا ایمکان وئرمیر . نتیجه ده دولایی یوللارلا هدفه دوغرو دوروم یاراتماق لازیمدیر . کونکرئت اولاراق بئله ده دئمک اولار ،و منجه ان دوغروسو بودور کی ، ایلک اؤنجه گؤنئی اؤز ایستیقلالینی الده ائتمه لی ، سونرا ایسه بیرلیک پروسئسی باشلانمالیدیر . دئمک بؤتؤو آذربایجان امالینین گئرچک لشمه سینده ایکی عمده پروسئس جریان ائدیله جک دیر .

1 . ایلک اؤنجه گؤنئی اؤز ایستیقلالینی قازاناجاقدیر .

2 . و سونرا ایسه بؤتؤولوک و یا ایکی آذربایجانین بیرلیک پروسئسی باش وئره جک دیر .

ذاتن گؤنئی ین میللی ایستیقلالا قووشماسی بیرلیک پروسئسینین اساس ترکیب حیصصه سیدیر . اونا گؤره گؤنئی ین میللی ایستیقلال پروسئسینده بیرلیک وبؤتؤولوک شوعاری اؤزه رینده ایصرار ائتمک و اونو تشکیلاتلار آراسی واحید جبهه نین یارانماسیندا شرط کیمی قویماق جهالتدیر و کور ــ کورانه حرکت ائتمک دیر . بونو کیمسه دانا بیلمز کی ، ایکی آذربایجان ین بیر اولماسی و بؤتؤولشمه سی هر بیر آذربایجانلی نین اؤره ک آرزوسودور . حتتا بونو دیله گتیرمه سه بئله بوندان گؤزه ل آرزو نه اولا بیلر کی . بو آرزو دیللرده اولماسادا اؤره کلرده همیشه الوو کیمی یاشاییر و یاشایاجاقدیر .

بونا اساسن گؤنئی ده گئده ن میللی حرکتی و حادیثه لری دؤنیا ایجتماعیتینه چاتدیرماق اؤچؤن قوزئین بایراغینی اللرده گزدیرمک یانلیش بیر تدبیر و پولیتیکادیر . بورادا پولیتیکادان صوحبت گئدیر ، ایداللاردان یوخ . ایدال همیشه دئییشمز قالار لاکین پولیتیکا گؤنؤن طلباتینا گؤره دئییشیر . منه ائله گلیر کی ، بیزیم بیر چوخ آیدینیمیز بو ایکی مسئله نی سهو سالیرلار .

گؤنئی ین اؤزؤنه مخصوص بایراغی اولمالیدیر .( البتده بو بایراق هله لیک بیر بایراقدیر بؤتؤولویه قووشانا قده ر ) قالدی کی گؤنئی ین اؤز بایراغینین اولماسی بؤتؤ آذربایجان ایداللارینا نه اینکی قارشی دئییل بلکه بؤتؤولشمه یه دوغرو آتیلان اؤنملی آددیملاردان بیریدیر . آمما گؤنئی ین اؤز بایراغینین اولماسی بیر چوخ جهت ده ن واجیب و اؤنملی دیر . بو حاقدا اؤتؤروب دؤشؤنمک لازیمدیر .آمما هر حالی ــکاردا بایراغین دارتیشمالاری بیزی اصلی هدفیمیزده ن یاییندیرمامالیدیر . و او اصلی هدف ایسه گؤنئی ده گئده ن میللی حرکتی دستکله مه ک ، اونو حاقلی سسینی دؤنیا ایجتیماعیتینه چاتدیرماق و میللی بیرلییه دوغرو حرکت ائتمک . وسسلام

یاشاسین گؤنئی آذربایجان ایستیقلالی .